കിലോയ്ക്ക് 600 രൂപവരെ വിലവിരുന്ന ചെമ്പല്ലിയെ ഇനി കൃത്രിമായി പ്രജനനം നടത്താം
സാങ്കേതികവിദ്യ വികസിപ്പിച്ചത് ചെന്നൈ ആസ്ഥാനമായ കേന്ദ്ര ഓരുജലകൃഷി ഗവേഷണ സ്ഥാപനം (സിബ)
കൊച്ചി: മത്സ്യകൃഷിക്ക് വൻ നേട്ടമായി ഉയർന്ന വിപണന മൂല്യമുള്ള ചെമ്പല്ലിയുടെ വിത്തുൽപാദനം വിജയം.
ഇന്ത്യയിൽ ആദ്യമായാണ് ചെമ്പല്ലിയെ കൃത്രിമമായി പ്രജനനം നടത്തുന്നത്. ഇതോടെ, സംസ്ഥാനത്തെ മത്സ്യകർഷകരുടെ ഏറെ നാളായുള്ള ഒരു വലിയപ്രതസന്ധിക്ക് പരിഹാരമായി. ഏറെ ലാഭകരമായ ചെമ്പല്ലിയുടെ കൃഷിക്ക് കർഷകർക്ക് വിലങ്ങായിരുന്നത് ഹാച്ചറിയിൽ ഉൽപാദിപ്പിച്ച
കുഞ്ഞുങ്ങളെ ലഭിക്കാത്തതായിരുന്നു. ജലാശയങ്ങളിൽ നിന്ന് വല്ലപ്പോഴും ലഭിക്കുന്ന കുഞ്ഞുങ്ങളെയായിരുന്നു ഇതുവരെ മത്സ്യകർഷകർ ആശ്രയിച്ചിരുന്നത്. വിപണിയിൽ കിലോയ്ക്ക് 600 രൂപ വരെ ചെമ്പല്ലിക്ക്് വിലയുണ്ട്. ചെമ്പല്ലിയുടെ കുഞ്ഞുങ്ങളെ ലഭ്യമാകുന്നതോടെ കായൽ പോലെയുള്ള ഓരുജലാശയങ്ങൾ ധാരാളമായുള്ള കേരളത്തിൽ മത്സ്യകൃഷിയിൽ വൻ മുന്നേറ്റമുണ്ടാകുമെന്നാണ് കരുതുന്നത്.
ചെന്നൈ ആസ്ഥാനമായ കേന്ദ്ര ഓരുജലകൃഷി ഗവേഷണ സ്ഥാപനമാണ് (സിബ) ചെമ്പല്ലിയുടെ വിത്തുൽപാദന സാങ്കേതികവിദ്യ വിജയകരമായി വികസിപ്പിച്ചത്. അഞ്ച് വർഷത്തെ ശ്രമങ്ങൾക്കൊടുവിലാണ് വിത്തുൽപാദനം വിജയകരമായത്. മാംസളമായ ചെമ്പല്ലി സ്വാദിഷ്ടവും മലയാളി തീൻമേശകളിലെ ഇഷ്ടവിഭവവുമായതിനാൽ തന്നെ വിപണിയിൽ ഇവയ്ക്ക് ഏറെ ആവശ്യക്കാരുണ്ട്. ഉയർന്ന വളർച്ചാനിരക്കും ഏത് പരിതസ്ഥിതിയോടും പെട്ടെന്ന് ഇണങ്ങാനുള്ള ശേഷിയുമുള്ളതിനാൽ കൃഷിചെയ്ത് ഉൽപാദിപ്പിക്കാൻ വളരെ അനുയോജ്യവുമാണ് ചെമ്പല്ലി.
കായലുകൾ, കുളങ്ങൾ എന്നിവിടങ്ങളിൽ കൂടുകൃഷി, പെൻകൾച്ചർ വഴിയും പരമ്പരാഗതരീതിയിലും ചെമ്പല്ലി കൃഷി ചെയ്യാം. ആറ് മാസത്തിനുള്ളിൽ അരക്കിലോ തൂക്കം കൈവരിക്കുന്ന വളർച്ചാനിരക്ക് പുതുതായി പ്രജനനം നടത്തിയ ചെമ്പല്ലിക്കുണ്ടെന്ന് സിബ ഡയറക്ടർ ഡോ കെ കെ വിജയൻ പറഞ്ഞു. ഈ സാങ്കേതികവിദ്യ ഉപയോഗിച്ച് ചെമ്പല്ലിയുടെ ഹാച്ചറിസംവിധാനം വികസിപ്പിക്കാൻ താൽപര്യമുള്ളവർക്ക് സാങ്കേതികവിദ്യ കൈമാറാൻ തയ്യാറാണ്. ഈ സാങ്കേതികവിദ്യ വ്യാപകമാകുന്നതിലൂടെ കേരളത്തിൽ മത്സ്യകൃഷി കൂടുതൽ ജനകീയമാക്കാനും അതുവഴി ആഭ്യന്തര മത്സോൽപാദനം കൂട്ടാൻ സഹായിക്കുമെന്നും അദ്ദേഹം പറഞ്ഞു. മികച്ച വാണിജ്യമൂല്യമുള്ള ഓരുജലാശ മത്സ്യങ്ങളായ കാളാഞ്ചി, പൂമീൻ, തിരത എന്നിവയുടെ വിത്തുൽപാദനസാങ്കേതികവിദ്യ നേരത്തെ തന്നെ സിബ വികസിപ്പിച്ചിട്ടുണ്ട്.
സിബയുടെ ചെന്നൈയിലെ ഹാച്ചറിയിൽ ആദ്യഘട്ടത്തിൽ ഉൽപാദിപ്പിച്ച ചെമ്പല്ലി കുഞ്ഞുങ്ങൾ തമിഴ്‌നാട്ടിലെയും കേരളത്തിലെയും തിരഞ്ഞെടുക്കപ്പെട്ട കർഷകർക്ക് നൽകി സിബ ഗവേഷണ നേട്ടം ഔദ്യോഗികമായി രാജ്യത്തിന് സമർപ്പിച്ചു. ഇന്ത്യൻ കാർഷിക ഗവേഷണ കൗൺസിൽ (ഐസിഎആർ) ഡെപ്യൂട്ടി ഡയറക്ടർ ജനറൽ ഡോ ജെ കെ ജെന മുഖ്യാതിഥിയായി.
